“Uch avlod uchrashuvi”
Joriy yilning 9 oktyabr kuni Surxondaryo viloyat sudi va Surxondaryo viloyat ma’muriy sudi tomonidan sud tizimida doimiy ravishda yo‘lga qo‘yilgan “Ustoz-shogirdlik” an’anasi tadbiri davom ettirildi.
Vazirlar Mahkamasining 2021 yil 16 sentyabrdagi tegishli bayoniga asosan, joriy yilning 4-10 oktyabr kunlari “Keksalarni e’zozlash, ularga hurmat-ehtirom ko‘rsatish-xalqimizga xos ezgu fazilat” g‘oyasi ostida “Keksalar haftaligi” ham o‘tkazib kelinmoqda. Shunday uchrashuvlardan biri Surxondaryo viloyat sudlarida ham bo‘lib o‘tdi.
Unda sud tizimida ishlagan faxriylar va faoliyat yuritayotgan sudyalar hamda zahiradagi bo‘lajak sudyalardan iborat uch avlod yig‘ilgan mazkur tadbirda Xudoyar Muxammadiev, Qurbonpo‘lat Jo‘raev, Oyimjon Yakubova va Xudoyberdi Noraliev singari qator faxriylar tashrif buyurishdi.
Surxondaryo viloyat ma’muriy sudi sudyasi Sunnat Xalmatov so‘zga chiqib, sudyalarga yaratilgan shart-sharoitlar, imkoniyatlar borasida to‘xtalib, sud faxriylariga ko‘rsatilayotgan e’tibor uchun o‘z minnatdorligini bildirdi. “Odil sudlovni chinakamiga ta’minlash, qonun ustuvorligi va adolatni barqaror bo‘lishini, barcha sudyalardan fidoiylik va qat’iyatlilikni bo‘shashtirmaslikni, shuningdek yosh sudyalar va zaxirada bo‘lgan bo‘lajak sudyalarga faxriylardan o‘rnak olish zarurligini aytib o‘tdi.
So‘zga chiqqan mehnat faxriylari esa uzoq yillik faoliyati davomida orttirgan tajribalarini sudyalar va bo‘lajak sudyalar bilan o‘rtoqlashib, ularning ish faoliyatlariga ulkan zafarlar tilashdi.
Tadbir davomida Sudyalar assotsiatsiyasi raisi Ubaydulla Mingboev qalamiga mansub, o‘z ichiga 8 ta mavzuni qamrab olgan “Adolat insonparvarlikning oliy nuqtasi” nomli risolasi sud faxriylari, sudyalar va sud xodimlariga topshirildi.
