КОРРУПЦИЯГА ҚАРШИ КУРАШ – ДАВЛАТ СТРАТЕГИЯСИНИНГ УСТУВОР ЙЎНАЛИШИ
Ҳар бир соҳада бўлгани каби, бугуннинг долзарб муаммоси бўлган коррупцияга қарши курашиш соҳасида ҳам мамлакатимизда чуқур ислоҳотлар амалга ошириб борилмоқда.
Жумладан, “Коррупцияга қарши курашиш тўғрисида”ги қонун ва унинг қўлланилиши режалари янги таҳрирларда қабул қилинмоқда. Шунингдек, жиноий жавобгарликни кучайтириш ва коррупцияга алоқадорликдаги аниқ нормалар жорий этишга алоҳида аҳамият берилмоқда.
Шу каби, ушбу соҳадаги мутахассисларни тайёрлаш ва жамоатчиликни хабардор қилиш юзасдан кўплаб семинарлар, тренинглар ва маърузалар орқали давлат ходимлари, соҳибкорлар ҳамда жамоатчилик орасида коррупциянинг зарарлари ва қарши курашиш усуллари бўйича тарғибот ишлари олиб борилмоқда. Бу чоралар фуқароларнинг коррупцияга нисбатан нафратини оширишга кўмаклашмасдан қолмайди.
Қолаверса, жаҳон тажрибасини ўрганган ҳолда бир қатор халқаро ташкилотлар, жумладан БМТ, Жаҳон банки ва бошқа институтлар билан ҳамкорликда коррупцияга қарши стратегик режаларни амалга оширилиб, халқаро стандартлар асосида миллий дастурлар ишлаб чиқилди. Ўзбекистонда махсус хусусиятларга эга бўлган коррупцияга қарши курашиш органлари — Бош прокуратуранинг антикоррупция бўлими, Давлат хавфсизлик хизмати ва Давлат фискал хизмати тизимида коррупция фактларини аниқлаш ва олдини олиш бўйича фаолият кенгайтирилди.
Таъқидлаш жоизки, коррупцияга қарши курашиш соҳасида Давлатимиз раҳбарининг ўрни беқиёс ва диққатга сазовордир. Давлатимиз раҳбарининг 2016 йилдан бошлаб амалга ошираётган ислоҳотлари асосида коррупцияга қарши қатъий күраш давлат стратегиясининг устувор йўналишига айланди дейиш мумкин. Президентимиз шахсан коррупцияга қарши курашишда қатъий тизим яратишга алоҳида эътибор бериб, унинг олдини олиш ва аниқлаш учун кескин чоралар кўришни доимий равишда қатъий топшириқлар сифатида бериб келмоқда. Давлатимиз раҳбарининг ташаббуси билан коррупцияга қарши қонунчилик базаси мустаҳкамланди, давлат органлари фаолияти очиқлаштирилди ва ҳокимият органларида коррупциявий ҳолатлар аниқланганда, дахлдорларни қаттиқ жазолаш бўйича қатъий кўрсатмалар берилмоқда.
Хулоса ўрнида айтганда, Ўзбекистонда коррупцияга қарши курашиш соҳасида фаол чора-тадбирлар амалга оширилмоқда. Бу эса, давлат бошқарувининг шаффофлигини ошириш ва мамлакат иқтисодий барқарорлигини таъминлашга хизмат қилади. Янги қонунчилик, мутахассислар тайёрлаш ва халқаро ҳамкорлик жараёнлари коррупциянинг турли кўринишларига қарши самарали курашишни кафолатлайди.
ХАСАН АБРАЕВ,
Сурхондарё вилоят судининг иқтисодий ишлар бўйича судьяси